ცენტრალური კრიმინალური პოლიციის დეპარტამენტის დირექტორის, დავით კიკნაძის თქმით, საქართველოს შინაგან საქმეთა სამინისტროს თანამშრომლებმა ე.წ. „ქურდულ სამყაროსთან“ დაკავშირებული 29 პირი დააკავეს. კიდევ სამ პირს დაუსწრებლად წაუყენეს ბრალდება, მათ შორის ერთ-ერთი ცნობილი „კანონიერი ქურდი“.
კიკნაძის თქმით, ბრალდებულები აქტიურად მონაწილეობდნენ პირებს შორის ფინანსური დავების მოგვარებაში პირადი სარგებლის მიზნით. ამ პროცესში ჩართული იყო საზღვარგარეთ მცხოვრები ე.წ. „კანონიერი ქურდი“ ბესიკ ჯაფარიძე, რათა გაეძლიერებინა თავისი კრიმინალური გავლენა და ფსიქოლოგიური ზეწოლა მოეხდინა კონფლიქტის მხარეებზე.
„ბოლო 24 საათის განმავლობაში ქვეყნის მასშტაბით ჩატარებული ყოვლისმომცველი ოპერატიული და საგამოძიებო მოქმედებების შედეგად, შინაგან საქმეთა სამინისტროს ცენტრალური კრიმინალური პოლიციის დეპარტამენტის თანამშრომლებმა, გენერალურ პროკურატურასთან ერთად, სასამართლოს გადაწყვეტილების საფუძველზე დააკავეს ე.წ. „ქურდული სამყაროსთან“ დაკავშირებული 29 პირი. კიდევ სამ პირს ბრალი წაუყენეს დაუსწრებლად, მათ შორის ერთი „კანონიერი ქურდი“, რომელიც საზღვარგარეთ იმყოფება.
გამოძიებამ დაადგინა, რომ სისხლის სამართლის საქმეში ბრალდებულები, პირადი ფინანსური სარგებლის მიზნით, აქტიურად მონაწილეობდნენ პირებს შორის ფინანსური დავების მოგვარებაში.
ამ პროცესში ჩაერთო საზღვარგარეთ მცხოვრები ე.წ. „კანონიერი ქურდი“, ბესიკ ჯაფარიძე, რათა გაეძლიერებინათ თავიანთი კრიმინალური გავლენა და ფსიქოლოგიური ზეწოლა მოეხდინათ კონფლიქტის მხარეებზე. საზღვარგარეთ მდებარე კრიმინალურ ავტორიტეტთან შეთანხმებით, ბრალდებულები, კონფლიქტის მხარეებთან ერთად, პერიოდულად აწყობდნენ ე.წ. „ქურდულ დაპირისპირებებს“.
დისტანციური კომუნიკაციისა და პირისპირ შეხვედრების დროს, ბესიკ ჯაფარიძემ, კრიმინალური სამყაროს წესებისა და ე.წ. „ქურდული ტრადიციების“ შესაბამისად, მიიღო საბოლოო გადაწყვეტილებები, რომლითაც ერთ მხარეს მეორე მხარისთვის მნიშვნელოვანი თანხის გადახდა დაევალა.
გამოძიებამ ასევე დაადგინა, რომ ვალდებულებების შეუსრულებლობის ან ვადების დარღვევის შემთხვევაში, ბრალდებულები მოქალაქეებს და მათ ოჯახის წევრებს ფიზიკური ძალადობით, სხეულის დაზიანებისა და მკვლელობით ემუქრებოდნენ.
სამართალდამცავი ორგანოების თანამშრომლების მიერ ჩატარებული ჩხრეკის შედეგად, ბრალდებულების მობილური ტელეფონები და კომპიუტერული ტექნიკა, რომელსაც ისინი ერთმანეთთან და საზღვარგარეთ მცხოვრებ ე.წ. კრიმინალურ ავტორიტეტთან კომუნიკაციისთვის იყენებდნენ, მტკიცებულებად ამოიღეს.
გარდა ამისა, ჩხრეკის დროს პოლიციის თანამშრომლებმა მტკიცებულებად ამოიღეს უკანონოდ შეძენილი ცეცხლსასროლი იარაღი და საბრძოლო მასალა.
გამოძიება მიმდინარეობს საქართველოს სისხლის სამართლის კოდექსის 223-ე პრიმა, 223-ე ტერტია, 223-ე კვარტა და 236-ე მუხლებით, რაც 15 წლამდე თავისუფლების აღკვეთას ითვალისწინებს.
საქართველოს შინაგან საქმეთა სამინისტროსთვის ერთ-ერთი მთავარი პრიორიტეტია ორგანიზებული დანაშაულის წინააღმდეგ ბრძოლა, მათ შორის ე.წ. „ქურდული სამყაროს“ და ყველა, ვინც რაიმე ფორმით არის ჩართული ამ კრიმინალურ სქემაში, დაისჯება კანონის სრული სიმკაცრით“, – განაცხადა დავით კიკნაძემ.
About the Author
